Fuglar
Grágæs
Grágæsir eru farfuglar að öllu jöfnu en sumar hafa séð þann kost vænstan að dvelja allt árið um kring hér á landi. Um 500 fuglar af þessari andaætt hérlendis taka þá ákvörðun að hefja sig ekki á loft yfir hafið til Bretlandseyja að haustinu. Þeir fuglar lifa þá að mestu á brauðgjöf niður við tjörnina í Reykjavík. Grágæsir eru plöntuætur sem éta bæði villtan og ræktaðan gróður.
Stofnstærð grágæsa er um 10.000 - 20.000 pör að sumri en eins og áður kom fram um 500-550 fuglar að vetri. Grágæsir eru útbreiddir varpfuglar um Evrópu. Hingað koma þær flestar frá Bretlandseyjum um mánaðarmótin mars-apríl.
Á níunda áratugnum bar víða meira á grágæsum fram eftir vetri en áður þekktist og talið stafa kannski af því að fólk fór að klekja út eggjum í meira mæli og ala ungana upp. Einnig gæti verið skýringu að rekja til aukinnar skotveiði þar sem töluvert verður um særða fugla eftir skotveiðitímabilið að hausti.
Grá- og heiðargæsir eru friðaðar frá 15. mars - 20. ágúst ár hvert.
Heimild: Íslenskir fuglar, Ævar Petersen,1998.
Heiðagæs
Heiðagæsin er fyrst og fremst hálendisfugl sem heldur sig bæði norðan og sunnan heiða. Varplönd heiðagæsa eru einkum í gróðurvinjum á hálendinu.
Síðsumars, þegar heiðagæsir fella fjaðrir og eru ófleygar, halda þær sig víða í hópum á hálendinu. Þær gæsir sem ekki unga út það árið fara til Norðaustur-Grænlands til að fella fjaðrirnar.
Áður fyrr var heiðagæsum sem og grágæsum smalað saman uppi á hálendinu þegar þær voru í sárum, inn í rétt og veiddar þar. Kjötið var eftirsótt en einnig var hægt að nýta fjaðrirnar í sængur og kodda. Þetta gekk mjög nærri stofninum en menn sáu að sér í tíma.
Stofnstærð heiðagæsa er um 20.000-25.000 pör að sumri en að vetri flytja þær sig langflestar til Bretlandseyja. Ekki er vitað til að neitt af þeim dvelji hér vetrarlangt líkt og grágæsin, en þær koma ofurlítið seinna á vorin eða í lok apríl. Heiðagæsir eru jurtaætur sem sækja einkum í mýragróður, starir, hálmgresi og fleira.
Veiði á heiðagæsum er leyfð frá 20. ágúst - 15. mars ár hvert.
Heimild: Íslenskir fuglar, Ævar Petersen, 1998.Stokkönd
Stokkendur
Stokkendur eru algengar hér á landi allt árið og sjást mjög oft hér í Laugardalnum í heimsókn. Þær hafa þó ekki verpt hér innan garðsins.
Að undanskildum æðarfugli þá er stokkönd útbreiddasta og algengasta andategund hér á landi.
Stofninn telur nú um 10. 000 - 15.000 pör. Þær eru plöntu- og dýraætur, sem dæmi um fæðuval er: brúsakollar, nykrur, krækiber, skeldýr, klukkur og kuðungar.*
*Heimild: Íslenskir fuglar, Ævar Petersen, 1998.