Fréttir
Mikið var um að vera á M12- deginum á laugardaginn en um 13.000 manns komu í garðinn. Nýr og stærri fallturn var tekinn í notkun og flykktist fólk í hann til þess að prófa, enda var frítt í tækin í boði M12. Sjávardýrasafnið og vísindaveröldin voru ekki síður vinsæl. Söfnin fylltust af fólki sem vildi skoða nánar lífverur sjávar í kringum Ísland og kynna sér veröld vísindanna. Snertiker safnsins er komið út og vakti það mikla lukku hjá yngri kynslóðinni sem nýtti sér óspart að komast í snertingu við dýrin, enda ekki á hverjum degi sem hægt er að halda á lifandi krossfisk og klappa ígulkeri og kröbbum. Á meðfylgjandi mynd má sjá krakka fulla af áhuga við að skoða sjávardýr safnsins.