Fallegasta fiðurfé landsins
Hænusýning Eigenda- og ræktendafélags Landnámshænsna verður haldin í Fjölskyldu- og húsdýragarðinum laugardaginn 27. júní. Gestum á laugardag mun gefast kostur á að kjósa fallegustu hænuna og hanann.
Klukkan 16.00 mun svo fara fram verðlaunaafhending þar sem eigendum fallegasta hanans og fallegustu hænunnar verða afhent verðlaun. Fiðurfé á öllum aldri verða til sýnis og gefst gestum meðal annars kostur á að fylgjast með hænuungum skríða úr eggjum á staðnum.
Markmið þessa félags er fjölþætt en það hefur það meðal annars að markmiði að kynna, viðhalda og vernda stofn landnámshænsna og að skapa hænunum sess meðal landsmanna. Allar nánari upplýsingar um starfsemi félagsins er að finna á heimasíðu þess www.haena.is