Vorið er komið
Vorið hefur boðað komu sína í Fjölskyldu- og húsdýragarðinum þrátt fyrir hvíta jörð og nokkuð frost. Í gærmorgun bar huðnan Perla tveimur hvítum kiðlingum, hafri og huðnu. Perla er gráflekkótt á litinn en faðirinn heitir Brúsi og er hvítur á litinn. Brúsi virðist láta burðinn hafa lítil áhrif á sig en Perla sinnir móðurhlutverkinu að kostgæfni.
Huðnurnar eru um tveimur mánuðum á undan áætluðum burði hjá ánum en frjálsar ástir ríkja í geitastíunni. Nú er beðið átekta með að sjá hver verður næst í röðinni að bera en líkur eru leiddar að því að það verði huðnan Ísbrá sem er einnig gráflekkótt á litinn og lestina reki þá svartflekkóttu huðnurnar.